Teksto: Eva Breukink
Fotografia: Studiorootz | Berber van Beek
Pa Ahmad Ayoubi (1951) ku tin añanan largu ta traha komo kriadó di abeha, un kolonia di abeha tin tiki sekreto. Ayoubi sa esaktamente kiko ta sosodiendo den su sesenta kashinan di abeha. Tambe e sa ki ora ta e momentu pa kosechá e miel. El a krese na Libanon. Aya kasi hinter su famia tin abeha. Pero na momentu ku e yega Kòrsou ku su 18 aña, ta parse ku e no lo sigui e tradishon di su famia. Aki e ta kuminsá traha komo skrèinwèrker serka un inmigrante libanes. Ahmad a haña un oferta masha atraktivo serka un kompatriota. Anto komo Ahmad ta hóben i ambisioso el a aseptá e oferta. Pues e ta disidí pa sali di su pais natal pa traha un tempu na Kòrsou. Finalmente e ke bai Merka. Su dianan di trabou na Kòrsou ta absurdamente largu. E ta traha di shet’or di mainta te un or di mardugá. Den su kurason e sa ku tur kos lo sali bon. Anto na final di e periodo difísil ei, e ta haña rason. E ta haña tur e oranan óvertaim ku el a traha pagá. Ku e bunita sparpòt ei Ayoubi por kuminsá riba su mes.
E ta kuminsá bendiendo merkansia riba kaya. Ku su stationwagen merikano e ta kore di kas pa kas. Tur kos e ta bende: muebel, radio, frishidèr. Negoshi ta bai bon. Anto ora ku e haña chèns pa kumpra e merkansia di un pakus ku a bai bankrut, e no ta laga e chèns ei pas’é bai. Na aña 1975 e ta habri Muebleria La Belleza. E empresario libanes hóben ta eksitoso. Sinku aña despues, su muebleria ta esun di mas grandi na Kòrsou. Pa hopi tempu kos ta bai bon. Pero despues di algun perkanse e ta sera su pakus na aña 2010. Ta manera ku esaki tabata predestiná… e ta skohe pa e direkshon den kua su famia tabata aden…Ahmad Ayoubi ta bira kriadó di abeha. Tur kos ta kuminsá ku un aviso den korant. Esun ku tin molèster di abeha por yam’é i e ta pasa kita e nèshi sin kobra. Di e manera ei apikultor Ayoubi ta kolektá un kolonia di abeha tras di otro. Anto awendia ta esei e ta hasi ainda.
“Mi tin 71 aña anto ainda diariamente mi ta pasa piki nèshi di abeha. Tin biaha asta ocho òf nuebe bes pa dia. Na kas di hende, na kompania, den naturalesa. Bo ta haña e nèshi na e lugánan di mas straño. Anto nan por kousa basta problema. Por ehèmpel den plafòn di un baño. Kuater aña pasá mi a subi te na 50 meter den un pipa di e refineria. Ora e abehanan ta ekstremadamente haltu asina, nos ta usa un trùk ku un left aden. Polis, gobièrnu, Aqualectra, nan tur tin mi number i nan ta yama mi ora tin problema ku abeha.”
“Nos ta kita e nèshi, bai ku e kolonia di abeha i pon’é den un kashi. Nos ta tene e kolonia trankil hasiendo uso di huma. Den un kanika di stal nos tin karton i tabaku, anto e huma di esaki nos ta usa. E abehanan ta sinti nan mes menasá i nan ta chupa nan mes yen di miel. Na e momentu ei nan tin un karga balioso serka nan i nan ta ménos agresivo. Un abeha ta muri despues ku e hinka un hende. Mi no ke mata abeha, pero tin biaha no por di otro manera. Por ehèmpel na momentu ku tin un nèshi den pipa riba e tereno di Isla, nos no por usa huma. E ora ei mi ta sera e buraku. Abeha gusta sinta den spiker. Den un kaso asina mi ta trese e spiker bin Suffisant kuné. Aki tur mi kashinan ta. E ora ei mi ta laga e kolonia trankilisá promé.”
“Bo mester sa kon pa taha ku abea. Mi tabatin shete pa ocho aña mi tabata wak kon mi rumannan, swanan i tionan na Libanon tabata traha ku abeha. Ta asina ami a siña. Ta esei tabata mi base tempu ku mi a kuminsá komo kriadó di abeha na Kòrsou. Den tanskurso di aña mas investigashon a wòrdu hasí, anto a desaroyá mas método i téknika. Aworaki por ehèmpel nos ta traha a base di un diseño standart di kashi fo’i Merka. Ei bo ta haña tur e struktura kologá aden kaba. Esei ta spar e abehanan hopi trabou. Asina nan no mester pasa trabou bai buska material pa traha e panalnan mas. Di e manera ei nan ta produsí miel ya despues di tres luna, na lugá di shete luna. Mi ta masha gradesidu ku dòkter Sommer di Barber. El a siña mi hopi tokante e sistemanan mas modèrnu pa kria abeha. E maneranan mas sofistiká.”
Ousilio! Tin abeha den baño!
Apikultor Ayoubi ta traha un parti di su kashinan pa abeha e mes. Di multiplex. Esei ta pidi presishon i konsentrashon. Anto ei su abilidat komo skrèinwèrker ta bini di bon. E kashinan ku ta kla kaba e ta pidi na Merka, pero eseinan ta karu. Den un kashi ku dos piso tin sigur 20 mil abeha ta biba. Ora un abeha nanse e ta haña un tarea spesífiko. Pero esaki por kambia dependiendo di e sirkunstansianan di e nèshi, anto loke na e momentu ei tin mester di dje mas tantu. Ayoubi ta hasi e komparashon ku parlamento di un pais. Un grupo di e kolonia di abeha ta disidí ta kiko ta loke mester sosodé. Si tin mester di mas nèktar. Of si a yega tempu pa un reina nobo. Of si tin muchu tiki abeha maskulino. Ta parti e trabou i tur hende ta tene nan mes na e reglanan. Ta esei ta e sekreto di e asina yamá ‘honeybee democracy’. E demokrasia di un kolonia di abeha.
Mi ta bai ku henter e kolonia i mi ta pon’é den un kashi.
E nòmber ta hasi bo kere ku ta e reina ta esun ku ta disidí ta kiko ta sosodé den e kas òf kashi di abeha, pero no ta asina kos ta. Ta su yunan ta manda. E reina ta simplemente e mama di e kolonia. E no ta hasi nada otro ku pone webu, 1.500 pa dia. Dependiendo di loke e nèshi tin mester, e reina ta skohe pa fertisilisá un webu sí òf nò. E ta fertilisá webu ku e spèrma ku e tin wardá den su barika. E webunan ku el a fertilisá e ta pone nan den sèl chikí hèksagonal; nan ta bira e abehanan feminino (e trahadónan). Anto e webunan ku no ta wòrdu fertilisá ta krese bira abeha machu i ta drumí den e sèlnan grandi na e panal.
Sin habri e kashi Ayoubi por sinti si tin sufisiente miel aden. Ta te ora mayoria di e sèlnan di e panal ta bon será, ta ora pa kosechá. Esaki ta sosodé algun biaha pa aña, anto mas tantu den tempu di awa. Pues di novèmber te ku febrüari. Ayoubi i su trahadó ta bisti un trahe spesial di apikultor, anto nan ta usa huma. Nan ta usa esaki pa tene e abehanan trankil. Pasó un kolonia no semper ta kontentu ora e haña bishita di manera imprevisto, i e abehanan por ta poko krepchi.
Huma ta trankilisá e abehanan.
E miel di e apikultor no ta labrá i no tin nada èkstra aden. Esei ta e diferensia ku produkto di fábrika. Miel di fábrika frekuentemente ta líkido, anto ta wòrdu kentá bou di preshon i ipèrs dor di felter fini. Un apikultor manera Ayoubi ta zuai e miel friu for di e panalnan. E no ta duna su abehanan kuminda èkstra, manera awa ku suku. Tampoko den temporada seku ora ku tin tiki flor i un kolonia tin ménos nèktar i pólen. Su miel, Pure Honey De Savaan, ta naturalesa puru i kolmá ku vitamina i ènzim.
Tur kos ta kuminsá ku e nèktar ku e abehanan ta bin kuné. Nan ta warda esaki den e sèlnan di e panalnan. E ora ei e grupo di kuidadó ku ta den e kashi – mas o ménos un tersera parti di e kolonia – mester sòru pa e stòk di miel tin sufisiente awa (19%). Ayoubi ta splika e proseso di chupa awa i seka. Si e miel ta bon, ta sera e sèl ku un kapa di was. Ayoubi ta yama esei: “Well-done”. Sa pasa ku den temporada di sekura, e abehanan ta habri e sèlnan i chupa e miel ku tin aden. Ta nan derechi ya komo nan ta traha e miel akí pa e kolonia mes i no pa hende.
Den mi famia tabatin hopi apikultor.
Ta kologa e rèkinan ku ta sali di e kashinan di abeha na un silinder ku ta kuminsá drèi rònt. Di e manera ei e miel ta sali di e panal kai den e keter i sak bai abou. Eibou tin un kranchi pa por tap e miel. Tambe tin kliente ku ta kumpra e panalnan. Ayoubi ta ofresé esakinan den baki. Kaba ta pone steker di Pure Honey De Savaan riba e bòter i bakinan, anto e kosecha ta kla pa bende. E kompania ta produsí mas o ménos mil kilo di miel pa aña.
No ta agregá nada na e miel.
Abeha ku ta produsí miel ta usa un supstansha fèt pa traha nan panal. Ku e was ei na nan pia, nan ta traha e sèlnan hèksagonal den kua nan ta warda e miel i e pólen. Ta bisa ku e was ei tin kualidat pa para infekshon, anto otro variedat di uso. Por ehèmpel ta hunta muebel kuné i pone nan bria bèk. Of pa produktonan di kuido di kutis. Ya komo e ta hidratante. Ta usa e was pa traha bela i for di hopi tempu ta yena djente kuné. E was ta dirti ku 65 grado, anto e ta bira duru ora e fria. Apikultor Ayoubi ta usa e panalnan di e nèshinan ora el a bai buska abeha otro kaminda. E ta herebé e panalnan. E ora ei e shushi ku tin na nan ta drif i e was ta sak bai abou. E ta pone un parti di e was den su kashinan. E abehanan por usa esei pa nan sigui konstruí nan panalnan. Sobrá e ta bende.
All bees have a single task.
