Ora bo skohe produkto lokal, bo ta apoyá sosiedat, ekonomia lokal i medio ambiente. Produktonan lokal ta mas fresku i kasi semper mas barata. Tin ménos transporte i shushi. Ademas esaki ta hasi nos ménos vulnerabel i mas independiente di faktornan eksterno.
Ora bo kumpra lokal, bo tin un impakto positivo.
Ku kada kompra ku bo hasi lokal, abo ta hasi un diferensia!
Produktonan agríkola lokal hopi biá ta mas barata. Ta trata di hasi e eskoho korekto. Si bo ke ekonomisá, kumpramentu di produktonan lokal ta un bon opshon.
Sèn ku nos gasta na produktonan di Kòrsou ta keda na Kòrsou. Si mas sèn keda na Kòrsou, por invertí mas. Na momentu ku bo kumpra direktamente di e kunukero, e ta hasi mas ganashi i por invertí mas.
Nos ta mas konektá ora tur hende kumpra lokal. Bo ta haña sa di unda bo kuminda ta bini i bo por topa e kunukeronan.
Produktonan ku bo ta kumpra direktamente di un kunukero ta hasi su ganashi krese. Ku mas ganashi, e kunukero por invertí mas. Por ehèmpel, e kunukero por pidi un karpité den su bisindario pa konstruí un greenhouse i e por buska un elèktrishèn pa pasa koriente. Di e manera akí, otronan tambe ta kompartí den e ganashi i pone pan riba mesa pa nan famianan. Hasiendo bo eskoho pa kumpra produkto lokal abo ta apoyá hinter e komunidat.
Huntu nos ta e kambio!
Produktonan di agrikultura lokal ta biaha direktamente di tera pa e punto di benta. Ménos CO2 pa bo produktonan alimentisio ta nifiká un lastr’i pia di karbon mas abou i un impakto mas abou riba kambio di klima.
Empake ta protehé produktonan durante e biahe pa nan yega e punto di benta. Mas largu e biahe ta, mas empake tin ku usa. Na Kòrsou no tin sufisiente posibilidat ni maneho di resiklahe di shushi. Komo resultado di esaki shushi ta akumulá i e serunan di shushi ta sigui krese. Produktonan lokal ta rekerí ménos empake i ta kousa ménos polushon i shushi na Kòrsou.
Nos ta dependé di kuminda tur dia. Produkshon di kuminda lokal ta brinda mas stabilidat i ta ménos influenshá pa faktornan global. Pensa riba guera, desaster natural i konflikto polítiko. Un ehèmpel ta seramentu di frontera entre Venezuela ku Kòrsou, esaki a influenshá importashon di fruta i bèrdura for di Venezuela.
Mas produkshon lokal ke men mas akseso independiente na sufisiente produkto, pagabel i nutritivo.
Pues ku kada kompra lokal, abo por hasi un gran diferensia.
Bo ke sa unda bo por kumpra produkto lokal? Primi aki.
