Yeimar
Andres
Maria
Teksto: Eva Breukink; Photografia: Studiorootz | Berber van Beek
Kunukero Yeimar huntu ku su kasá Alfredo, su primu Andres i su suegra Maria ta manehá e kunuku ku ta karga e nòmber Di Nos Tera Organic Farm. Ken lo por a kere? Seis aña pasá Yeimar tabata gana su pan di dia den sektor di limpiesa.
Anto alabes no ta asina straño. Yeimar su mayornan ta kunukero. El a lanta na Sur-Amérika. Aya su tata ta kultivá bèrdura i e tin galiña. Yeimar a bisa ku esei no lo ta nada p’é. Te ora el a topa Alfredo.
“Nunka mi kera bira kunukero, pero awor mi ta gusta! Nos a siña e métodonan di kultivo tradishonal di nos mayornan. Anto awor nos mes ta deskubrí kua téknika modèrno tin.”
Aki na Bándariba su suegra Maria ta biba, anto na Bándabou su suegro Alfredo senior i su famia nobo ta biba. Afredo senior huntu ku su kasá Lidia i yu Ivan tin un toko i kunuku na Santa Cruz. Esaki ta un famia portugues ku ta stima agrikultura.
Pues Yeimar i su kasá ta hasi loke nunka nan a pensa: nan ta hür un kunuku banda di Maria su kas, nan ta limpia dos di e tres hèktar i nan ta kuminsá traha komo kunukero.
Bo ta sinti nan amor i respèt pa naturalesa asina bo kana subi e tereno di ‘Di Nos Tera Organic Farm’. Miéntras ku pafó tráfiko ta bai bin, akiden tin un trankilidat sereno. Yeimar i Andres ta kitando yerba malu ku ta krese mèimèi di e matanan yòn.
E kunuku ta bende nan produktonan na un supermerkado so. E kalidat mester ta perfekto. Riba e tereno bo ta mira e bèrduranan di kustumber manera kònkòmber, yambo, silantro i siboyo-largu. Pero tambe tin kòusebant i táyerblat.
“Nos ta sembra loke e kliente pidi. E ora ei bo sa sigur ku bo ta bende e kosecha. Nos no ke kosechá muchu di un vegetashon. Ya komo e ora ei bo ta daña e merkado.”
Táyerblat ta krese bon na un lugá ku sombra. Den solo kayente e blachinan ta kambia koló. Den e lunanan kayente e blachinan di mayoria mata ta bira hel, anto e kosecha ta produsí ménos entrada.
“Nos ke protehé mitar di e kunuku ku un tela ku ta wanta solo. Lus di solo sí por pasa, pero e ta wanta e solo fuerte.”
Kasi sinku aña despues ku nan a kuminsá, nan por biba di e benta na e supermerkado. Ora nan kuminsá ku algu, nan ta bai kompletamente p’é. Loke ta bon, semper por mihó. Asina sobra poko sèn, nan ta invertí esaki promé den un sitema di drep. Ku e sistema akí nan ta spar hopi tempu i awa.
E sistema di drep ta pegá na hinter e kultivo riba e tereno. Tur mata ta haña e awa ku kada un tin mester pa medio di e sistema di pipa i buraku ku ta distribuí e awa. E sistema ta bin di dos pos, un tank’i awa, pipa i slan. E awa di pos ta yena e tank’i awa danki na pòmp ku ta traha ku energia solar. Djei e ta pasa dor di pipa diki bai e kunuku.
“Kada tantu tempu nos ta habri òf sera un yabi. Di e manera ei kada bes un parti di e tereno ta haña awa. Entretantu nos mes por hasi otro kos.”
Ku ta bai poko-poko ku awa, ta pas kompletamente den e filosofia ku nan tin na ‘Di Nos Tera Organic Farm’. E famia tin un meta: nan ke pa e kunuku ta totalmente biológiko. Anto kasi nan ta asina leu.
Tin biaha ta imposibel pa no usa pestisida kímiko kontra un plaga di insekto. Pero nan tin nan mes reseta kontra fúngus, baktéria i insekto. Nan ta pone blachi di e palu di Nim drumi den un hèmber ku awa. Ademas e matanan ta keda saludabel danki na e kòmpòst natural ku nan ta usa.
Tur kos ta kuminsá ku e simia. Nan ta buska e mihó opshon ku ta krese den e klima di Kòrsou. P’esei nan ta kumpra e simianan den eksterior. Di e manera ei nan ta kosechá bunita kònkòmber bèrdè i pal’i papaya ku e frutanan di mas dushi.
“No ta asina ku bo ta sembra e simia anto ku sobrá ta bai di mes. Por ehèmpel bo no mester planta kònkòmber muchu serka di otro. E ora ei e matanan yòn ta putri i nan no ta krese. Simia di sèldu hustamente mester wòrdu di stroi pa despues basha poko awa riba nan. Esaki ta konosementu ku nos a haña di nos ansestronan.”
Aki na e kunuku nan ta pafó hinter dia. Ora di sosegá nan ta hasi esaki bou di un fíkùs gandi. Ei tin dushi sombra i ta fresku. Ta aki nan ta bebe i kome algu. Aki ta papia tokante loke mester sosodé. Ta aki nan ta sosegá den hamaka. Pa despues nan ta bai traha.
Nan tayér tambe ta pafó, bou di un palu grandi di tamarein. Esaki ta duna hopi sombra, i ademas nan por kologá tur kos na dje. Aki nan ta drecha loke ta dañá, aki nan ta traha nan insektisida biológiko. Anto aki nan ta prepará e vitaminanan pa e matanan
Bou di e mesun palu akí nan ta pone e pedidonan pa siguiente dia kla. Esei ta un trabou mashá presis. Mester laba, kita yerba malu i sobrá di tera, anto traha bòshi. Kaba ta tapa e makutunan ku sak’i paña muhá. Di e manera ei e bèrduranan ta keda bunita i fresku te su siguiente mainta pa bai entregá.
“Kasi tur kos nos ta hasi huntu, manera un tim. Planta, chapi yerba malu, kosechá. Nos sa esaktamente kiko nos por fèrwagt di otro. Esaki no ta un trabou di 8 pa 4. Nos ta sigui traha te ora e trabou ta kla, tin biaha te 10 or djanochi.”
Su suegra Maria, sa masha hopi tokante e forsa medisinal di mata i yerba. E ta pasa e konosementu akí pa su yu i su nuera. Maria ta kuida e matanan di yerba. Manera Flor de Jamaica (kayena) i lamúngras. Nan ta medisinal anto dushi komo té.
Na e kunuku tin diferente palu i yerba ta krese ku ta yuda kontra un kantidat di malesa. Nan ta krese, méskos ku rònt Kòrsou. Esnan ku ke sa ta kiko ta mihó pa usa ora e tin un malesa, ta haña konseho gratis. Mayoria di biaha ta trata di konosí, amigu i famia.
Tur tipo di konseho. Te di blachi di mango kontra dolor di barika, yerb’i hole kontra kentura, moringa kontra grip, anto guyaba kontra insomnio. Sòrsaka ta konosí komo e kura di kemoterapia natural i e yerba marga ku ta machiká i saka piedra den nir.
Yeimar, Alfredo i su ruman hòmber di parti tata, Ivan Gonçalves di Plantage Santa Cruz ta yuda otro. Huntu nan ta buska inovashon i téknikanan modèrnu di kultivo riba internèt. Esun tin mester di simia, e ora ei e ta duna e otro. Esun ta hasi pedido di slan, anto e ta pidi pa e otro tambe.
Anto lógikamente regularmente nan ta pidi nan tata Afredo konseho. “Mi suegro a koba hopi pos den su bida. El a siña nos ta kua ta e mihó lugánan pa koba pos riba nos tereno. Semper nos ta pidié konseho ora nos mes no sali afó.” Loke nan tin en komun ta e amor enorme pa kultivashon di fruta i bèrdura.
“Ora bo kosechá loke bo mes a sembra, bo ta sinti un orguyo enorme. Ta un sintimentu masha bunita. Fruta i bèrdura kosechá lokalmente ta hopi mas dushi tambe. E bakobanan ta sut sut. Silantro ku bo importá kasi no tin holó, pero esun di Kòrsou bo ta hole djaleu. Dushi!”
E kampaña akí ta posibel danki na entre otro MEO (Ministerio di Desaroyo Ekonómiko).
