Adriana Costa
Manuel Costa
Teksto: Eva Breukink
Fotografia: Studiorootz | Berber van Beek
Nos dos ta hasi tur kos.
For di dia ku nan a topa na aña 2015 nan ta inseparabel. Manuel i Adriana Costa a topa na Colombia. Adriana (1974) ta yu di un kampesino kolombiano ku ta kria baka. E kampesino grandi akí sa esaktamente kiko un baka – ku ta duna lechi – tin mester pa e baka sinti su mes bon i produsí lechi optimalmente. Manuel (1966) ta di desendensia portugues i a siña e trikinan di kultivo di fruta i bèrdura.
El a lanta meimei di e kamponan ku mata di bèrdura i palu di fruta. Riba e mésun tereno ei Manuel i Adriana awor tin un kunuku chikí miksto. Nan tereno ta mas o ménos 19 mil meter kuadrá. Adriana su tata tabata un kampesino komersial ku tabatin mas ku dos mil bestia. Adriana i su kasá tin den kareda di binti baka i algun toro. Tambe nan tin karné, kabritu i ganso ta kana rònt. Den otro kouchi tin algun sloke i un porko. E bestianan ta nan ‘yunan’ i ta esnan di mas importante. Pa nan bestianan nan ta lanta mainta tempran entre 5 or pa 6 or. Anto p’esei nan no ta bai drumi nunka mas lat ku 10 or djanochi.
Nan ta hasi tur kos huntu. Miéntras ku Adriana ta sòru pa e fèlt ku e yerba gigante ‘miscanthus’ – ku tambe ta wòrdu yamá yerba di olefante – i saka mèst for di e stalnan, Manuel ta bai entregá e pedidonan di lechi. Otro biaha Manuel ta konstruí un dak pa sombra, miéntras ku Adriana ta duna e bakanan awa i kuminda. Ora tin sufisiente lechi nan huntu ta traha yògùrt, keshi òf manteka. Nan ta un tim. E pareha Costa ta mantené nan kunuku manera un mashin ku ta marcha zetá.
Amor. E amor intenso ku nan tin pa otro, pa nan bestia i matanan ta duna Manuel i Adriana e forsa i energia ku nan tin mester pa rùn nan kunuku. Ta ku e amor ei nan a konstruí e stalnan, planta e yerba i palunan di fruta. E responsabilidat ta enorme. E bakanan no por pasa un dia sin kuminda. E yerba no por pasa un dia sin awa.
“Mi tabatin ocho aña ora ku mi mayornan a kumpra e tereno akí. Tabata un mondi. Nan a limpié pa lanta e kunuku. Trinta aña pasá mi tata a bai Madeira bèk, aya el a nanse. Promé ku mi a sera konosí ku Adriana, mi tabata planta fruta i bèrdura akí. Shete aña pasá nos a kumpra nos promé baka. Mi suegu a fayesé dos aña pasá. E tabata serka nos na diferente okashon. Kada biaha e tabata keda pa un periodo di tres luna. Den e periodonan ei mi a siña masha hopi mes serka dje.
Mi a asta siña kon bo por sinti si un baka ta dek, anto kon grandi e bisé ta. Esei no ta fásil. Ora bo mester fula, bo dedenan ta bo wowonan. Nos mes ta kuida e bakanan, mas tantu ku ta posibel. Tambe ora nan ta malu. Si mester apliká un infüs pa e fortalesé, pone angua kontra un infekshon òf kose un herida, mi mes ta hasié. Ora e baka ta bai pari, nos ta yuda e bisé nanse. Awe mi a inyektá Junior, e toro chikí ei, kontra pruga. Wak e, e no tin ni tres luna. Mayoria di e toronan ta bai. Nan ta wòrdu di slaktu pa nan karni. Mi sa bende nan únikamente ku hende si mi sa sigur ku nan lo kuida nan bon i nan no lo pasa hamber.
Nos no tin mester di masha ya komo ku nos no tin yu chikí. Ami tin un yu muhé na Kòrsou i Adriana tin un yu hòmber na Colombia. Pero nan dos ta hende grandi kaba.”
“Tabata un paso grandi pa mi bin biba Kòrsou ku Manuel. Na Colombia mi tabata un mama soltera ku un bon trabou i masha independiente. Mi tabata traha komo inspektor di siguridat pa diferente kompania manera entre otro pa Coca-Cola. Tabata difísil pa laga tur kos i tur hende atras. Mi mayornan, mi famia, kas di mi mayornan, tur hende i tur kos. Anto tòg mi no ta arepentí. Mi ta sinti mi pais su falta. Klaro! Pero mi ta kontentu ku mi ta aki.
Mi stima bestia. Ora un bestia ta sufri, mi ta sinti due. Loke mi sa tokante baka, mi a siña serka mi tata. For di mucha, pero tambe despues. Mi sa kiko bo mester paga tinu riba dje. Aya den stal tin un baka ku ta bai pari pronto. E no ta sintié bon. Bo ta ripará na su oreanan. Nan ta drumí patras i plat. Kisas e tin kram.”
Ménos gastu, ménos desperdisio.
E bakanan ta forma e núkleo fuerte di e kunuku miksto di pareha Costa: Rancho Agropecuario Patricia. Patricia ta Adriana su di dos nòmber. Agropecuario ta spañó pa agrikultura (agro) i krio di bestia (pecuario). E kombinashon akí ta hasi posibel pa e kunuku por traha di manera kompletamente outosufisiente. Na kas den nan mes ‘tienda’ Manuel i Adriana tin lechi, manteka, keshi, webu, fruta, bèrdura i karni. Nan ta gana sèn primordialmente ku benta di lechi i produktonan trahá ku lechi. Pero nan ta bende mèst i bakoba tambe. E produktonan ei ta na benta na e kunuku mes i na mayoria di e supermerkadonan grandi na e isla.
Meta ta pa hasi uso di tur loke e kunuku ta produsí. E mèst ta wòrdu usá pa e yerba, anto e yerba ta kuminda fresku pa baka. E sírkulo ta kompleto. Esei tin dos bentaha grandi: ekonomisá riba kompra i ménos desperdisio. E filosofia akí ta parse e prinsipionan di permakultura. Esaki ta un método alternativo di kultivo i estilo di bida den kua kuido pa planeta i hende, anto kon ta kompartí loke tin di manera hustu, ta pará sentral.
Na Rancho Agropecuario Patricia tur baka i toro tin nan mes fail den kòmpiuter. Den kada fail tin e nòmber i fecha di nansementu di kada un. Tambe tur punto spesial manera ki dia nan a haña remedi pa bichi, un infekshon òf otro malesa, anto tratamentu di un herida.
E kantidat di lechi ku un baka ta produsí, ta dependé entre otro di e momentu riba kua el a pari un bisé. Produkshon di lechi ta optimal un te dos luna despues di a pari un bisé. Despues e kantidat di liter ta baha tiki tiki. Depues di ocho te dies luna e produkshon ta stòp kasi kompletamente. Manuel ta duna e ehèmpel di un di su mihó bakanan. E baka ei a produsí sigur binti liter di lechi pa dia, te seis luna despues ku su promé bisé a nanse.
Manuel i Adriana ta duna nan bakanan sesenta dia di tempu pa nan sosegá despues di a pari. Ta despues di dos luna un di e toronan por dek e baka atrobe. Mínimo 45 dia promé ku e pari e baka no ta produsí. Den transkurso di hinter un aña no tin mas ku dos te tres baka ta dek pareu. Esaki ta pa evitá ku tin skarsedat di lechi. Den e periodo ‘seku’ ei, e baka ku lo bira mama ta produsí kolòstro. E lechi akí ta diki i yen di proteina i nutriente. Ora e bisé nanse e ta haña e lechi akí bebe. Esaki ta masha importante pa su kresementu i pa su resistensia. Tin biaha un karné ku a kaba di nanse ta bebe entre ocho pa diesdos liter di lechi pa dia serka su mama. Pues e ta bebe hopi lechi den su promé simannan.
Nos no ta benta nada afó.
Na e kunuku tin un stal spesial kaminda mainta tempran ta hala lechi di e bakanan. E ambiente ta masha agradabel. E porta di e stal ta habri anto Manuel i Adriana ta yama nan ‘krio’ na nan nòmber. Luna! Promes! E baka ta kana bai paden. Djis pa ta sigur nan ta mara su pia na un kabuya i despues ta hala e lechi ku un mashin. Ta hasi esaki mientras ku e baka ta komiendo for di e baki su dilanti.
Tur siman, tin biaha dos biá pa siman, Rancho Agropecuario Patricia ta entregá lechi pasterisá na e supermerkadonan di mas grandi na Kòrsou. Pa esei ta kenta e lechi den un mashin te 74 grado i kaba ta fria e lechi den 15 sekònde. E asina yamá ‘sjòk térmiko’ akí ta sòru pa mata e mikro-organismonan. Esaki ta un trabou ku Manuel i Adriana ta preferá pa hasi huntu. Ku e mésun esmero ku nan tin pa nan bestianan, nan ta yena e bòternan i pone etikèt di nan negoshi riba nan.
Únikamente ora e produkshon di lechi di e bakanan ta bon riba nivel, ta sobra sufisiente lechi pa traha otro produkto. Por ehèmpel yògùrt, manteka òf keshi. Esei ta sosodé na kantidat chikitu ku ta bende na e kunuku mes. Manuel i Adriana ta traha keshi pa smer i e keshi típiko di Medellin ku yama ‘Paisa’. Paisa ta nòmber di un region na Colombia.
Pa un produkshon di lechi optimal, ta importante pa e bakanan haña bon alimentashon i sufisiente awa. Na e parti patras di nan tereno Manuel i Adriana tin yerba i kaña. Di e manera ei nan tin e parti di mas grandi di e kuminda pa nan bestianan bou di nan mes maneho. Algun aña pasá Manuel a kumpra yerba di olefante serka un kompania na Seru Loraweg. El a kumpra un pikòp yen. E yerba spesial akí por krese te un haltura di tres meter i mei te kuater meter. Ta p’esei e yama yerba di olefante. Ku sufisiente awa e ta krese bai gol. Despues di mas o ménos tres luna e yerba tin tur ingrediente ku un baka tin mester: material gròf na e parti abou, proteina na e parti mei-mei, anto líkido na e punta.
Tur dia e bakanan ta haña yerba kòrtá fresku fresku. Si e stelchinan di e yerba òf kaña ta muchu duru, ta machiká esakinan ku un mashin i pone nan den e bak’i kuminda pa tur bestia haña kome. Kuantu yerba Manuel i Adriana ta kòrta pa dia, ta dependé di loke nan ta duna nan bakanan kome èkstra. Normalmente un baka ta kome entre dies te diesdos porshento di su propio peso na yerba. Esei por ta entre 50 pa 60 kilo pa dia. Ratu ratu e kunuku ta haña bòstel di un fábrika di serbes. Tambe nan tin un kantidat grandi di melase – ku ta bini for di Colombia – wardá na nan tereno. Ta meskla e bòstel i melase ku e stelchinan di yerba kortá finifini i duna e bestianan komo alimento suplementario.
Mèst pa e yerba, yerba fresku pa e baka.
No únikamente e yerba ta mes haltu ku olefante, pero e yerba tambe tin masha set. Riba e tereno tin un pos, pòmp i dos renbak ku ta sòru pa hinter aña tin sufisiente awa. Pa medio di pipa ta pòmp e awa – for di e renbak – manda riba e tereno. Kaba ta manda e awa via slan pa e kultivonan na e kunuku. E tereno kaminda e yerba i kaña ta krese ta partí den mas ku binti sekshon. Ta kuestion di habri i sera un yabi kada binti pa trinta minüt. Di e manera ei kada mata ta haña awa tur dia.
Nan no ke krese i bira mas komersial. Manuel i Adriana tin plan sí pa drecha i amplia. Manuel ta trahando un dak pa asina tin mas sombra kaminda e bakanan ta kana lòs. “Di e manera ei nan tin ménos molèster di e solo kayente. Esei ta mihó pa nan salú i pa e produkshon di lechi.” Tambe e ta bai planta un yerba lastradó. Esaki ta bini for di Colombia kaminda e yerba ta krese den wèi. “E yerba akí tin mas proteina ku e yerba di olefante, anto e tin mester di ménos awa”, Manuel ta konta.
E kunuku ta kasi kompletamente outosufisiente.
